Poesie / Angelo Caria

A chie li dimannaiat, “Chie setzis vois?” Angelo li risponniat ” Nois semus so semenes chi anticos massaios aian cubau in sa cassia de s’ istoria, pro ch’esseren creschidos”

A dolu mannu nostru  Angelo no est prus in mesus de cussos semenes, no est in mesus de sos semenes ma est restatu massaiu, isse puru at postu e at a sichire a ponner semenes in sa cassia de s’istoria.

Sos semenes son totu cussos sardos chi pro meritu de Angelo an cunpresu cantu siat bellu unu mundu fatu de populos liberos, in pache e rispetosos s’unu de s’ateru.

De Angelo sa morte s’inc’at picatu su corpus ma non sas ideas , mancu totu sa vida s’at poitu picare, dae tenpus Angelo de sa vita sua n’aiat fatu istrinas a su populu suo, pro chi seret restatu viu, pro chi aret apitu un’istoria e una dignitate.

Sa vera vita de Angelo no est finita , vinas ch’est viu su populu sardu est viu puru isse.

Oje Angelo sichit su caminu non prus chin sas ancas suas ma chin sas ancas de s’istoria, chin sas ancas de totu sos patriotas sardos chi sont naschitos e chi ant a naschire  dae s’incunza de cussos semenes chi isse c’at postu in sa cassia de s’istoria.